Breek-en-gryp-diefstal is aan die toeneem in Benoni en omliggende gebiede. Tussen drie en vier voorvalle word weekliks daar aangemeld.
Die Benoni-polisie het motoriste gewaarsku om op die uitkyk te wees en die nodige voorsorg te tref.
Lt. Nomsa Sekele, ’n polisiewoordvoerder, het gesê motoriste moet waardevolle items soos handsakke buite diewe se bereik sit.
“Sit die items in die kattebak of waar die diewe dit nie kan sien nie.”
Gebiede waar die breek-en-gryp-diefstalle veral plaasvind is:
- Morehill
- N12-Snakeweg-afrit
- Tom Jonesstraat
- Bunyanstraat-op- en afrit
- Rangeviewweg by die Dewald Hattingstraat kruising
- Lancasterweg naby die Sasol-vulstasie (tussen 05:00 en 08:00 en 18:00 en 23:00)
- Atlasweg
Sekele het gesê die polisie doen alles in hul vermoë om die diefstalle stop te sit.
“Slagoffers moet alle voorvalle asseblief by die polisie aanmeld.”